週六 － 運醬煮大餐

食過午飯後特地到官塘大孖買醬料番屋企整晚餐 ... 豆豉蒜蓉醬、蜆蚧醬、五度陳醋浸蒜頭、15年陳鹹檸檬、泰國無溝純香米、澳洲高純度健康食鹽 ... 大孖醬園o係觀塘崇仁街，地點唔算太方便，但佢貨品質素之高，真係絕對令住得都幾遠既我專程去入貨 ... 之後就到父母親住所，準備煮大餐孝敬佢地 ... 第一味 ~『豆豉蒜蓉醬蒸盤龍鱔』 母親專程去街市揀左條兩斤重白鱔，請魚販幫忙切好 (自己切都幾難搞)，洗淨 ... 將白鱔全身塗滿豆豉蒜蓉醬，盆圈在薑絲墊底既大碟上 ... 格水蒸18分鐘即成。

第二味 ~『蜆蚧醬鯪魚球』 買左魚檔既現成鯪魚肉，用兩隻瓷羹反複互拔，將鯪魚肉整成鵝蛋形"鯪魚球" ... 用細煲燒紅花生油，半煎炸鯪魚球成金黃色，伴蜆蚧醬。

（"蜆蚧醬"係中國嶺南地區既醬料，用新鮮蜆肉、汾酒、薑、陳皮絲 ... 等 醃製而成，其獨特既"咸鮮味"可能有d人會唔鍾意，但我和母親就非常喜愛!!! ） 第三味最簡單 ~『酸梅麵豉排骨』 酸梅 + 麵豉醬 + 排骨 (腩排) 撈混，格水蒸12分鐘即成。 其他重有 ... 用泰國純香米煮出既靚飯、准山杞子煲雞湯、青菜 ... 一家人開開心心食餐飯，傾下計，真係好開心！