滿足！

**終於收服左部新電腦！

不得不讚一句：偉大的祖國人材真強勁！

心情平伏番晒，可以正常生活啦 XD~

之前都已經好想寫今日這篇提材，但心煩氣燥，就暫時擱置 ...

現在正好寫番 ... ...

早前俾"珀瑜仔"捉左去睇電影，係佢最愛電影種類既戲 ...**

《生化危機：絕種生還者》(Resident Evil: Extinction)

**齣戲未上"珀瑜仔"睇到電影預告已話好想睇 ...

咁就第一時間同佢去睇喔 ...

"珀瑜仔"急不及待就自己走去櫃檯買飛，位售票員姐姐都好奇怪點解咁細個就識自己買飛，重要睇齣咁既戲 ...

珀瑜仔：唔該 ...

售票員姐姐：小朋友，你想睇咩戲呀?

珀瑜仔：唔該 ...  睇哩個 ... (指住海報) ... 恐怖人哩個 ... 唔該 ...

售票員姐姐：哩個呀!? 小朋友你幾多歲呀? 睇哩個你唔驚咩!?

珀瑜仔：唔驚 ... 小朋友最鍾意睇恐怖戲架！唔該 ... 我3歲 ... ...

售票員姐姐：... ... ... 咁係咪兩位呀? 一張成人一張小童?

珀瑜仔：唔係呀 ... 我未夠高唔洗飛架 ... 頭先我去度左高啦 ... 唔該 ...

售票員姐姐：... ... ... ... 喔 ... ... ... 好啦 ... ... ... ... ... ...

珀瑜仔滿心歡喜咁去買d野食就入場 ...

未開場 ...

我就同珀瑜仔講：場戲好多人睇呀！一陣如果有人坐你哩個位，你要起身喔！ok!?

珀瑜仔：唔得！我個位整左BB凳，唔可以俾人坐架！

我：頭先問你係咪自己坐，你又話唔自己坐，所以冇買你飛架！咁入到來你又要自己整BB凳自己坐 ... ... 不如我出去買埋你個位啦！

珀瑜仔：好呀！你去啦！我o係度等你！

我：... ... ... ... ... ... 咁你坐定唔好郁喔，亂走會有壞人捉你架！

咁我就急急腳出去買埋佢個位，其他觀眾亦漸漸入場 ...

當我行番入去，就見珀瑜仔又發揮緊佢既本能 ... "撩女仔" ... ... ...

我地既坐位係戲院右邊獨立既兩坐位，珀瑜仔正同前排既兩位靚姐姐"閒聊" ...

當我慢慢行埋去，就聽到有個靚姐姐問：你一個人自己睇戲呀!? 你唔驚咩!?

珀瑜仔：唔係呀 ... 我爹爹出去買野 ... 我唔驚 ... 我最鍾意睇哩d戲 ...

開始播片，我亦行到埋去 ...

珀瑜仔見到我，就同兩個靚姐姐講：我爹爹番來啦 ... 唔講住啦 ... 開場啦 ...下次傾過啦 ... ...

真係俾佢激死 XD~

到講齣戲 ... ... ...

一貫刺激緊張動作連場既娛樂片，中段例排有d慢有d悶場 ... 但珀瑜仔就睇得好開心好興奮！

散場時其他觀眾先發現，有個咁細個小朋友入場睇哩齣戲，都報而驚訝既目光，重竊竊私語話：九成係個男人想睇，捉埋個細路部佢 ... XD~

但我同珀瑜仔就好滿足！**