有陣時真係好怕有人問我點解唔去某某大party而我會喺某某小小Bar出現，呢個人喺間Bar撞到我我唔認識，不過我都會回答佢嘅問題：「我唔鍾意囉。」「吓？?會唔鍾意嘅咩？」佢個樣真係咁㗎?好詫異。然後佢問我鍾意聽咩，我話Techno, Bass, Jazz, 好多.... 跟住佢就將佢認為最勁嗰D DJ名講出嚟，認為我實鍾意（Hardwell, Steve Aoki), 我話太嘈，我過咗嗰個階段，唔鍾意。然後佢就開始聽唔明我講嘢。我明白佢想用音樂去打開話題，我真心appreciate。

回想起我認識Skrillex係佢2010年嗰隻My Name Is Skrillex, 其後佢有兩隻歌Scary Monsters & Nice Sprites(Phonat remix)同Cinema(Skrillex remix)我都分別有放喺四年前嘅兩隻mixtape入面, 問題係，鍾意音樂，係一個過程，會不斷追求更好嘅嘢，越聽越多，有D嘢過咗就過咗，返唔到轉頭，有咩咁詫異呢？我唔係話自己叻，或歧視鍾意Skrillex, Hardwell, Steve Aoki呢類DJ嘅人，每個人都有佢嘅階段，我只係希望大家唔好assume我一定會鍾意D'大'DJ，我心目中大嘅定義唔係佢有幾多followers、D歌有幾多view、係咪Top100DJs, 打嘅party有幾多人。Diplo更加唔洗講，我絕對唔欣賞佢對女性嘅價值觀，宣揚fing囉柚舞，容易令人將女性價值集中在肉體同技倆上。但真心高興香港有咁嘅大型party。

可能你會話我諗太多，去玩就係唔想諗咁多嘢⋯⋯ 你係去玩，我唔係。我認為身為音樂人對社會應該有責任，整隻歌出嚟Message好緊要，因為D young generation會比你影響，個世界已經係一個報憂不報喜，個人、肉體及物質崇拜嘅時代，作為公眾人物好應該出一分力，對社會有D貢獻，因為去玩嘅人/聽音樂嘅人真係唔會諗咁多，佢哋只會接收。

我喺嗰間小小嘅Bar出現係因為我朋友打碟，我去支持佢，起碼有Dam Funk聽。(https://www.stonesthrow.com/damfunk) 順帶一提佢唔止係實力派，對音樂充滿愛同passion, 平時喺lG仲成日post D鼓勵人嘅quote，人又humble，我有一次inbox佢問嘢佢真係會回答。唔係好似Gesaffelstein咁，以為自己好靚仔黑面唔肯同我朋友影相。

如果嗰位朋友睇到呢斷嘢請你唔好嬲，我只係希望你視野宏觀D，咁大家可以傾耐D。