完整睇曬王維基先生嘅記者會，於佢嘅政綱中很多建議，包括支持袋住先、支持三跑高鐵、支持開發郊野公園、同埋網絡23條等等，我都係表示唔同意嘅。

但成個presentation嘅完整度、認真做足功課嘅態度，以及後來記者答問中有話直說，毫不含糊，唔會為爭取選票或者怕得失選民，而答啲模棱兩可嘅答案，係我地香港立法會選舉當中非常非常欠缺嘅人物，呢個理直氣壯嘅姿態正係我所欣賞及支持嘅地方。

佢提出嘅方法你可以唔認同，但佢有花時間去提出唔同出路，呢個有幾多人有能力可以做到？即使我唔完全同意佢嘅立場，但最起碼佢俾我感覺到，佢係一位希望做實事嘅人。

一個社會唔需要全部人都認同全部人嘅意見，大家位置及看法都唔可能100%完全相同，無可能每個人都追求一模一樣嘅理想生活，有啲人比較務實，有啲比較理想化，一個城市唔係你一個住曬，總會有同你唔同意見嘅人。但只要係基於一個為自己地方做啲嘢嘅立場真心出發，我會支持任何願意犧牲自己舒適，企出嚟為自己，而唔係為任何組織，真心發聲嘅香港人。

稍為有丁點不同，就將對方視為敵人，用盡方法辱罵，呢種態度十分非常very幼稚，而明顯只會破壞，不能建設任何事情。 成熟嘅人，可以唔同意對方嘅全部，但依然可以欣賞對方所付出嘅態度，並且努力找出方法共融。 就係咁。

利申：我係香港島嘅選民。我呢一票，仍在觀望中。