今朝個live feed，見到咁多阿哥阿姐阿叔阿嬸返住工都特登落去排隊買飛，好多好明顯唔係我嘅歌迷，有啲連單丁位同朋友分開曬坐都唔介意，680買唔到就轉做480，480唔得就再變280，個個一副無所謂，支持到就得嘅撐硬姿態，實在令人感動到離曬譜，連買唔到嘅人都喺度戥我開心，學我朋友話齋：「邊有咁好㗎？」。

大家嘅熱情真係超出我意料外之好多倍，邊有人諗過萬幾二萬張飛dum出街，真係可以兩個幾鐘內掃清光，呢堆有種人嘅氣勢，香港人團結起嚟，仲有邊個敢睇小？

知道好多人買唔到，亦不忍心要大家再花時間排多幾次隊，所以決定一次過將能夠加嘅場數都一次過加曬佢（真係無期喇，最後就呢兩場）。講緊係兩萬四千張飛，全數放到大家手上，係有點冒險，但老實講，因為你地，我好有信心。

多謝曬今日特登花大半日去撲飛嘅朋友，衷心感激每一位。下個禮拜將有加場消息，敬請留意。

p.s. 唔好幫襯黃牛！ 唔好幫襯黃牛！ 唔好幫襯黃牛！ 唔好幫襯黃牛！

唔好幫襯黃牛