今天台上的感言。

「2014年，係香港經歷最大轉變嘅一年。喺一個從來只有權貴可以發聲，從來充滿潛規則嘅地方，雨傘運動由年輕人去證明咗，原來嚟到呢個新年代，每一個人都有表達自己，用自己嘅方法去發聲嘅權利。我地唔再需要別人去為我地提供舞台，我地發現，只要係有人民嘅地方，我地就可以創造出屬於我地每一個人嘅舞台。

今日係2015年嘅第一日，我地相信，一個嶄新嘅香港已經萌芽。但我地亦知道，未來將會更嚴峻，我地將會面對更多打壓及不公義。但正如歌詞裡面所講，「任暴雨下，志向未倒下」，雖然我地都只係雞蛋，面對高牆，我地一時三刻可能無能力去推翻，但我地依然可以將我地嘅意志畫上去，令我地嘅信念遍地開花。

「撐起雨傘」記錄咗一個時代，佢唔係屬於任何一位歌手，任何一間唱片公司，任何一個單位，「撐起雨傘」係屬於2014年，有為我地嘅地方付出過汗水與淚水，每一位有為自己去爭取過嘅香港人。」

呢份新年禮物，係由你地送比自己嘅。 革命一天未成功，雨傘心就不會死， 香港人，新嘅一年正式開始，我地一齊繼續加油。