過咗咁多日再講返。

呢兩集「矛盾」最後一段總結，高皓正話覺得近年嘅我好似比以前菇獨，感覺會對人更慢熱小心，只因為我經常提及我想獨處。我想稍為分析一下。

首先，我覺得呢個詮釋完全係出於我地價值觀上嘅真矛盾，導致佢對我某些說話同處事方法有很大程度嘅誤讀（咁可能我其實又唔係好鍾意無時無刻解釋自己）。

近年嘅我，追求獨處，出於一種個人修行嘅必要。人在年少時，會依靠繽紛喧鬧嘅環境、從外來嘅各種認同去找尋存在感，但到咗另一個階段，自然會想為生命找尋更深層嘅意義；而若想要找到答案，在我來講，別人無法為你代勞，亦唔係單靠一個「神」可以賦予，而是必須往自身裡面去追尋。

呢個係好個人的，唔同人可能站在不同角度，而呢個先係我地最唔同嘅地方，根本唔係咩性取向與宗教嘅差異，而係整體對人生嘅解讀方法。

我個性及思考模式自小偏哲／佛學，凡事都愛尋根究底，透過提出各種疑問去尋找真相，包括對自己。越往深處挖，越明白要去理解呢啲咁本質上嘅問題，必須花時間去獨處。人類近百年習慣用物質和外在世界去填充自身嘅問題，逃避寂寞，到頭來發現原來單靠外在嘅力量去支撐自己，只會換來更大空虛。

於是，為了成長，我會花時間去感受和理解「孤獨」；而其實當你越能面對孤獨，你就越不「孤單」。真正寂寞孤單的人反而最害怕獨處吧。

當然，「孤單」、「孤獨」在我來看字面上似乎是中性的，有很大的傳譯空間，亦要看說出來的人嘴裡的含義。高生說出來時似乎帶一點憐憫，連帶一啲歌迷都無故跟著擔心起來。我只想此擔憂顯然是不必的。

唯此課題太深奧太大，他日有空再一起討論討論吧。