勁歌 + 扶輪社晚宴

唔好意思﹐要大家變晒長頸鹿添!忙完一輪﹐終於可以停低﹐的起心肝寫下blog喇!第一個開心﹐因為有機會再上勁歌!咁啱遇著媽媽節﹐所以同Jason合唱咗兩隻歌送比天下嘅母親。揀咗兩隻幾不一樣嘅歌﹐因為以往母親節比人感覺一定要唱「媽媽 I love you」或者「真的愛你」之類嘅經典金曲﹐但係我就覺得﹐母親節除咗要同媽媽講聲我愛你之餘﹐作仔女更要學識點樣可以實際 D﹐具體 D去錫下媽媽﹐體貼媽媽。所以我哋最終就揀咗「Shall We Talk」同「聽媽媽的話」喱兩首歌﹐希望大家會多 D比時間同耐性去陪媽媽﹐多 D溝通﹐多 D聽媽媽話啦!再送多隻「你是我的蝴蝶」比媽媽﹐感激佢帶比我繽紛燦爛嘅人生!

(哈哈﹐好中意今次套銀色西裝﹐仲加埋隻紅色蝴蝶添!真係名乎其實嘅打歌服呀!)

http://www.youtube.com/watch?v=WvToiM72umY

(亦可到以下網頁觀看足本勁歌金曲)http://mytv.tvb.com/music/jsg/24687

第二個開心﹐就係五月十一號晚被快活谷扶輪社邀請參加佢哋嘅dinner!當晚仲有個任務﹐就係同大家分享一下我作為一個樂壇新人嘅生活同體驗喇!真係超緊張﹐你叫我喺台上面﹐對住幾百﹐甚至幾千人唱歌就話無問題﹐不過要「演講」嘅話﹐少少地對住幾十個人我都會非常緊張!所以為咗唔會語無論次﹐幾個星期前就已經開始prepare要講嘅嘢﹐就算能力做唔到「演講」﹐簡簡單單用傾計形式都希望令大家覺得聽落有興趣﹐有內容啦!不過好彩﹐當晚嘅來賓好好﹐每位都好friendly﹐一去到就熱情咁招待我﹐令我無咁緊張。能夠認識到一班平時我生活圈子比較少遇到嘅人都係一個難得嘅經歷。十分欣賞喱一班傾力為社會唔同階層作出貢獻嘅專業人士﹐希望將來都會有機會同佢哋合作﹐參與佢哋咁有意義嘅活動﹐向佢哋學下嘢啦!