知唔知點解喵喵怪會講人話？

係寵物小精靈第71話喵喵怪因為鐘意左一另一隻俾人馴養左嘅喵女，而個隻喵女拒絕喵喵怪嘅原因係因為佢唔係人類，養佢唔起，俾唔到好嘅生活同靚衫佢著，就係因為咁喵喵努力學做人，學用雙腳行，學講嘢，有日，佢終於學識行路，但用雙腳跑令佢跑得比人慢，所以次次偷完野都俾人捉到，打到佢一仆一碌，但佢冇放棄，繼續努力學做人，學講人話，終於有日佢識講野，第一個學識嘅詞語係「火箭」。

成功用雙腳行路同講野之後，佢再次去搵喵女表白，「你睇！為左你，我而家成個人咁喇，用腳行又識講野！」點知，最後換嚟一句「喵喵喵」姐係：「死開啦，你又冇錢，你死窮喵嚟咋！仲有呀！一隻識講人話嘅喵真係好核突呀！」

因為咁，喵喵怪決定要做一個壞人，第日就算夾硬嚟，佢都要隻喵女做佢條女。之後佢就加入左火箭兵團。

後來，因為破產，喵女個主人唔再養佢，遺棄左佢係街邊，俾一隻高竇貓大佬捉左，仲用佢威脅喵喵怪加入自己嘅流浪喵社團，喵喵怪為左救喵女同高竇貓決鬥，戰勝後，佢以為可以得到喵女歡心，點知喵女話：「喵喵喵，喵喵喵！」姐係：「我同高竇貓生活太耐喇！已經冇辦法離開佢，同埋.....講人話嘅喵實在係太核突喇！」

呢個世界，好多時都係咁，你做好多嘢，你好努力你以為會有人欣賞，因為你嘅努力而感動，但其實一切都係你一廂情願，一切都只係「你以為」，你以為你咁做可以令佢幸福，你以為咁做佢會開心，原來一直佢同你所追求嘅野跟本係兩回事，永遠你都得唔到佢，永遠只有你付出，但換嚟嘅只有痛苦，好啦，你決定放棄，唔再做爛好人，但你又壞唔哂，就好似喵喵怪，變成一隻因為太努力學做人，而冇學任何技能，攻擊力極低嘅寵物小精靈。

不過唔好忘記，喵喵怪係唯一一隻識講人話嘅喵，佢絕對比任何小精靈珍貴，同埋雖然佢失去喵女，但佢仲有武藏同小次郎，咁你又搵到屬於你嘅「火箭」未？