因為收到朋友通知，話俾我知我俾西DorSi指拍片串佢，睇番留言完全唔知咩事，然後睇完佢嘅片，都唔明白自己串左人邊個地方，只係知大量留言指控我唔尊重人，串人，所以我不得不回應。 . 唔好話我對號入座，因為係你嘅觀眾入嚟攪事先，另外，所有留言有講我個名嘅，無論明示暗示，你都會俾心，如果我一句留言就將矛頭指向我，你俾心嘅舉動我都可以視為你講緊我，就算我訂閱係幾多，我都唔鐘意俾人抺黑。 . 首先，我地番大陸食嘢個條片，有讚有彈，飲食節目不嬲如此，我地覺得探魚辣，但唔係難食，只係我唔食得辣，片入面都有講。 . 第二，喜茶，首先我地冇用飲筒飲奶蓋，另外，我地覺得奶蓋係好飲嘅，只係啲奶同果汁唔啱飲，好化學味，如果大家認為喜茶係一定要讚，咁恕難從命，總結係唔值得排一個鐘，至於值唔值得，我覺得唔值得為呢杯嘢飲排一個鐘，你都可以覺得我唔值得排兩日買Supreme一樣，好主觀。 . 第三，海底撈，都冇咩好講，條片對海底撈評價都好正面，員工服務好，又抵，只係鐘意香港口味多啲，一樣啦，唔值得專登排隊去食。 . 第四，有人覺得我地講普通話講唔正係唔尊重人，片入面講，國內人嚟香港講廣東話，我地番大陸講普通話，係基於尊重先會咁講，除非，你唔認同，所以我去到國內講普通話好正常，我兩年前，去台灣講國語，一樣係咁差，冇台灣人話我歧視，冇人覺得我玩嘢，今次一樣，我主動講我咁爛嘅普通話，因為我覺得人地地方講人地語言好正常，講得好定唔好，至少肯試，有人話你去廣東地區講廣東話咪得，好抱歉，我成個旅程，係冇人講廣東話，不如你地講下點解？如果我真係只講廣東話，係咪又係串人？變左無視人？ . 第五，有人話我回觀眾留言時串其他Youtuber，係呢度我引用番個位觀眾嘅問題：「早前你話過唔欣賞youtuber番大陸 介紹大陸野食 應該優先介紹本地野 所以我就好好奇你拍今次段片嘅動機係咩呢 如果你係想話俾香港人知番大陸嘅理想與現實 我都明白 但萬一佢地真係好好食呢？ 你咪會變咗你唔鍾意嘅一群囉 定係你一早知佢無驚喜 俾人高估左 又或者佢係好好食你就唔出段片？」 . 我回應係：「條片我去Supreme NYC時順手拍埋，如果好食咪話好食，就唔似其他人專登去拍條片介紹大陸嘢食，所以呢條拍完就算冇咩特別我都唔會拍大陸嘢食。」 . 因為呢位觀眾嘅留言，我理解係佢覺得我地「專登番大陸拍嘢食去挑機」，而事實係我「真係唔係好似其他人專登番大陸拍嘢食片」。 . 我係講過，我地唔明點解啲人要讚到大陸啲嘢食天上有地下無，同唔會拍番大陸嘅飲食片，因為我地作為香港youtuber想介紹多啲香港嘅好嘢先。呢條片我地只係拍Supreme NYC時順便拍埋，本來諗住同一條片出，但原來可以出多條，所以先有呢條片。我真心唔明點解「專登拍條片番大陸拍嘢食」對人嚟講係負面意思，我唔想俾人咁講，只係唔想人誤會我「專登去大陸拍嘢食片挑機。」可能用詞有誤，所以大家理解有誤會，但坦白講我唔明點解話人「專登番大陸拍飲食」係串人？再退一百步嚟講，點解呢句係串緊你？明明有大把人拍緊番大陸食嘢嘅片，你覺得得你一個？仲要係我未睇過你嘅片嘅情況下串你？ . 第六，有人話我拍片態度輕佻，所以唔尊重人，什至似Rice Gum，我只想講，你知唔知Rice Gum做過咩？如果知，不如講下我地做過咩有相同之處？我係Youtube有更詳細嘅回應！ . 有人會話我唔需要因爲咁嘅事回應，俾人賺點擊人氣，我想講，當有啲事你唔出聲，你只會俾人一直抺黑，由其係對人格嘅指控，經過今次呢件事我更加清楚，呢個世界冇清者自清，好多人會唔理事實係點先對號入座，旁人就帶風向一沉百踩。 . 好嘅地方係我仲有清醒嘅觀眾，多謝你地明白我做緊咩，感激不盡。 . 之前嘅說話我係睇完 @saidorsi 條片回應有關我串佢嘅部分，而家到片嘅另一部分，有關佢拍片嘅辛酸。 . 首先，呢條片我係第一次睇你嘅片。 . 我同你一樣都冇任何公司Support，一個人撐到而家。 . 你講自己病左都要拍片，好辛苦錄音，我都深感認同，我又何嘗唔係病左都要拍片，繼續剪片，度橋出片，絕對明白你嘅辛苦。 . 我都行一條唔同其他大紫大紅Youtuber嘅路，我唔埋堆，我選擇有個句講個句做自己，賣廣告我地都講明係廣告。你係唔埋堆，但都請你唔好靠屈人去賺訂閱同點擊。 . 你話拍大陸嘢食俾人話政治化，我又何嘗唔係俾人「被政治化」？番大陸食個嘢有讚有彈，講普通話唔標準，都係唔尊重？ . 你話你Like唔過千，人地條條過十萬Views，我唔明點解你會突然咁講，但如果你真係講緊我，我嘅片過十萬都係我努力同埋同觀眾建立嘅關係所得嚟，冇人睇我地都會檢討，希望下次做得更好，今時今日嘅成績係我用努力同堅持一點一滴累積落嚟，你而家咁講就好似你嘅努力冇人睇到，我嘅努力係僥倖得嚟咁。 . 其實香港有更多嘅Youtuber都遇緊同你一樣嘅情況，點解你要用一個咁嘅標題去引人睇再係片尾講呢一番說話？我唔明你嘅用意。 . 另外，我睇完你嘅回應，俾我感覺你為左利用你觀眾嘅同情心，去引導你嘅觀眾認為一切你受嘅苦都係因我而起，所以先用「有Youtuber評擊我...」而去講以上嘅內容。 . 想睇我親自演繹，請去我Youtube睇新片，感謝各位??