相信每個人都會覺得自己所養嘅寵物都係世上最可愛嘅，真係唔明點解會有人忍受到要跟佢地分開？

可能喺別人眼中我唔算好愛佢地（起碼喺鏡頭前我營造唔到溫馨場面，扮唔到爸爸好耐無見呀仔果種感覺），如果要我跟佢地分開4個星期我都覺難受，何況更長時間？

我就係睇唔過眼有啲人鏡頭前可以同寵物嘴對嘴，可以講到點樣點樣愛佢地，最後到頭來卻可以一走了之遠走他方。三個月台證期滿要返香港有時間剩就會扮關心問候一下，喊哂口扮好想見佢地。

而家科技先進了，身處遠方想見自己寵物隨時可以叫家中傭工拍片、用webcam去見一見佢地，但咁樣你仲算係佢主人咩？仲算係你地嘅仔仔女女咩？

佢地始終係生命，並唔係你與別人嘅附屬品，唔係你遠走他方留比人打理後話要見就見；唔係你閒時比你娛樂嘅玩具，如果你真係當佢地係仔女你會忍心叫佢地幫你拉車去娛樂你地咩？會忍心一走了之到你得閒時先抽時間去望一望咩？

工作發展需要遠走他方而置之不理並唔係合理嘅理由，任何事都係取決於自己心態，你嘅世界可以好大，但係你寵物嘅世界就只得你呢個主人。所以希望想養寵物嘅你要諗清楚你可以為佢付出幾多，養緊寵物嘅你就要給矛更加多時間去盡自己責任，咁先係真正而不虛假嘅愛。