一條友食飯，緊係要諗吓點先食得滿足，咁啱我呢排迷上咗食韓國嘢，差唔多成條尖沙咀「韓國街」嘅韓國嘢我已經試哂，包括一個人食韓燒，之前我話試過一個人食放題，好多人都話好小事，要一個人打邊爐先夠勁，咁啱我行「韓國街」搵嘢食時，路經呢間臭臭鍋專門店，心諗一句：「臭你又鍋？」抱著好奇嘅心態我去咗呢間嘢試吓。

新開張成班人排長龍，個個都成雙成對一班朋友咁，又係得我一個嗌一位，等左陣，我頭也不回咁入去坐底。點知我遇到一個人食飯嘅「天敵」— 就係搭檯。

旁邊搭檯嘅係一對情侶，兩個淨係溝D醬都玩一餐，玩玩下，毛啦啦靜哂，我偷偷地望一眼，原來係個女仔停咗手，望住個男仔係度露出一個羞澀嘅微笑。大佬呀，唔好咁啦，你地坐我隔離顯得我好慘，慘到我自己都要同情自己。

算，生意好唔通唔俾人搭檯咩，佢地有十款唔同嘅鍋，我果斷揀咗佢嘅招牌臭臭鍋。

「一個招牌臭臭鍋。」，侍應將個鍋俾咗搭檯對情侶，個女仔即刻攞部手機係咁影個鍋，但我心裡面就知個鍋係我嘅，不過我冇出聲。「一個芝士牛奶鍋。」，佢地聽到先發現調轉咗，所以話，愛情係盲目，盲到自己叫咗咩都唔知。

個鍋入面有十幾樣嘢，其中有樣嘢叫米血榚，聽我聽得多，但我第一次食，「知唔知呢D榚係俾殭屍食？」如果我身邊有人陪我食，我一定會咁同佢講，可惜我旁邊只係得對我唔識嘅情侶。對情侶好快食完就走咗，張檯終於淨番我自己一個，我慢慢食埋最後個幾舊臭豆腐，我覺得身邊嘅熱鬧都唔屬於自己。

見到其他人係度你一言我一語，討論緊叫咩配料嘅時候，我諗起以前同人打邊爐、食火鍋，點咩料都會嗌餐死，又會話「喂！你夾哂我D墨丸呀！」，「佢食哂D肥牛囉！」我唔食牛，所以好少同人爭，但其實朋友就係咁：大家都俾咁多錢，你係霸哂D肥牛，又夾哂D嘢食，但食完大家都係會冇野，明知條友叫親佢去都係咁，但次次都會預埋佢。

火鍋熱辣辣嘅蒸氣迎面而嚟，唔知點解，我蒸到有D眼濕濕。