三個月前，我曾經以為自己咩都冇哂，眼見反正都冇嘢可以輸，就搏一搏，估唔到三個月後嘅今日，會有成七百人同我一齊直播倒數，去到凌晨四點都仲有成四百幾人同我一齊發癲、一齊「唔該你吖」、「求求你吖」、一齊「NicoNicoNi」。

今個倒數真係好難忘，「講衰嘢」、「發癲」、「光明會中止直播」、「大佬」、「木底鞋」、「鬧人」，呢幾個鐘嘅事，我發夢都冇諗過會發生係自己嘅身上。

好多謝同感激大家，如果冇左大家，我應該咩都唔係。新一年，希望大家繼續多多指教，如果有任何諗法，記得留言，你地嘅意見永遠都咁重要。（當然跟唔跟又係另一回事，NIcoNico Ni！）

未來嘅事冇人知會點，2017年呢個新開始，過去嘅人同事都無謂再提，亦都唔好因為過去嘅事討厭任何人，拍片嘅，我地睇影片質素同內容就夠，而唔係其他。

今年大家一齊繼續努力，向自己定嘅目標進發。但一定要記得：任何時候，唔好忘記要做個好人，要有禮貌，記住呢個世界有因果報應，自己做多一步，可能只係好少嘅改變，但足以令世界變得更加美好，唔該你吖。

祝大家新一年，開開心心，新年快樂！

星期二見！係咁先！Bye！

SUNNY 2017-1-1