如果呢個年頭，你買電話買16GB，或者8GB，一定俾人笑到面黃，但係今日嘅我好後悔買左64GB嘅電話。

現今世界嘅電話，係用嚟儲存人類回憶嘅地方，成日見有人唔見電話就喊苦喊忽，咩死鬼老豆老母張相係裡面呀，咩同D狗嘅相冇哂喇，咩個孫剛出世時影嘅相呀，幾乎所有重要嘅嘢都唔係放係夾萬或者曲奇罐入面，而係放喺電話。

有回憶就自然有你唔想見到嘅嘢，例如當你同某個人分開咗，以前你只要Delete咗佢個電話號碼同訊息就已經可以，但而家，你仲要開個電話嘅相薄出嚟一張張相去Delete！(當然，有人就算分開咗都唔鍾意Delete D相，仲俾人Hack埋添。）當要Delete個陣，回憶又湧上心頭，想剷機啦，入面又有其他嘢要留低，一路Delete，個心一路乸住乸住，明明係想忘記先Delete，但愈Delete愈難忘記。

呢個時候，你就會好憎部電話點解咁大容量，8GB咪好囉！駛咩影咁多相呀？電話打出打入咪得囉！真係自作自受。

當你Delete哂你唔想見到嘅相同片之後，你見到你部電話由50GB已用，變到得番30GB已用時，你就發現，原來大家嘅回憶只值20GB，呢20GB好難先有，但原來捨棄係咁容易。

攪完一大輪，望下部電話，你仲未Delete嘅包括：你班朋友 Whatsapp你嘅低能圖，你養嘅寵物，你親人嘅相，呢D嘢，你真係唔會捨得佢失去，仲即刻拿拿淋做番次iCloud Backup。