好喇，好快我又大一歲喇，係大個仔之前，我想同大家講一D嘢，我都諗左好耐，到底應該點表達最好，我希望我講完大家會明。

我知道大家鍾意睇我直播，可能我成日發癲啦，又鍾意我串，我又唔係好介意大家講咩，但我希望大家聽完、睇完，就會好似我地嘅直播一樣唔好留底，我希望大家知道，我直播唔係想講人是非，再等大家去用是是非非去攻擊任何人，我直播，原意只係同大家傾下計，了解下大家，從而係我拍片路上有所進步，所以大家都成日見我講檢討、檢討。

當然，我自己都有錯，係我太大意，受唔住大家壓力，講左好多唔應該講嘅事出嚟，係我自己錯在冇設好一條底線，以為咩都可以當講笑，我會繼續檢討，如何可以取得平衡，為此真心對唔住大家。

希望大家知道，無論點都好，好人壞人，唔係由我去講或者大家去決定，誰對誰錯，好人壞人，係個天去決定。唔好因爲是是非非對任何一個人有任何評價，我講緊嘅係：「任．何．一．個．人」。我地拍片嘅，不如簡單D，用番影片質素同創意去比較？其他嘅，大家真係唔駛操心或者需要為任何人覺得唔抵，因為個天會有安排。

最後，大個仔喇，我只希望有十萬訂閱，大家會喜歡我嘅影片，繼續支持我，希望好快可以請到大家食飯，其他所有嘅事，真心，唔好再提喇，真真假假，是是非非唔會幫助人成長，或者對成功有任何幫助，我希望大家知道，如果我有幸成功，唔係因為是是非非，而係我嘅片真係好睇。

唔該你吖，感謝大家。