放心喎，我冇事，有睇我Ig嘅會見到我話自己唔開心，多謝大家問候，但人數太多，係感動嘅，但我唔一個個覆喇，我係度一次過講啦。

講下點解我毛啦啦話自己唔開心，由係台灣番黎第一日開始，我就知台灣片唔會有好嘅成績，所以我叫大家一定要睇，因為我地用左好多時間同心機去拍，但點解我會咁講？某程度係因為我見到我一星期嘅片都上左熱門，雖然係值得開心，但同時代表Youtube會對我嘅Channel有所動作，可能巧合啦，上星期我一日一秒間跌左百幾訂閱，而尋日出片之前我一秒跌左兩百訂閱。

而家條片冇人睇，我知，你實話我有成萬人睇啦好多啦知足啦，我想講，當一條片完全達唔到自己嘅標準觀看次數個陣，我就會諗，係咪我拍得唔夠好？係咪太低能？定其實Vlog呢種類型唔啱我？但我睇番大家嘅留言，好多都好鍾意條片，好正面，咁點解咁少人睇？如果你係討厭呢類片，你可以留言或者Dislike，連咁都冇做，就姐係其實跟本冇人睇到或者唔知道出左新片，定係個標題唔吸引？所以要做標題黨先可以有人睇？我都唔知，到底台灣vlog嘅失敗，係因為條片太低能、Youtube有問題、標題唔吸引、新年個個出哂街定我拍得唔好，抑或以上所有嘢都關事？

我一直都將YouTube 放係第一位，所以去台灣，你地問我好唔好玩，我都答我做嘢咋，我希望拍嘅片，無論係廣告定普通片，大家都可以睇得開心，盡量去做到同人唔同，所以我都唔介意開多D live，我成日講唔想將自己個位Set到咁高，好多人同我講，邊有人拍片成日Live咖，你又唔係女，成日講咁多嘢冇哂新鮮感仲邊有人睇你呀，我一直都唔覺得係，但睇見條片咁，我又唔能夠唔咁諗，我都唔知，但可能真係關事都唔定。

咩訂閱完禁個鐘呀，叫朋友睇呀個D講埋今次都算啦，想就做啦，唔再提喇，始終我之前都講過，你地都會成長，都會對人生有另一種睇法，我同我嘅片係大家一生只係一個過客，就算我記得你都好，我都總有一日會被遺忘，呢個世界就係咁運作，唔會改變到。

另外，手信本來打算拍條片講，而家都係係fb影張相算，到時想要自己留意下啦，我唔想成日提你地睇，好似管家婆咁。

但大家放心，我過得好好，只係任何人都會有失落嘅時候，加上係台灣番到黎我已經好攰，有層無形嘅壓力下，我先講下自己唔開心。片會繼續246出，但新年唔會一日一片喇，大家可能忙住拜年或者行街，都未必有人會睇，聽日係台灣Vlog最後一條，鍾唔鍾意都好，有時間咪禁入去睇下。

多謝各位。