點解香港人毛啦啦個個都忽然黎明？

呢排你上開咩社交網站，人人都講黎明黎明黎明，有d我諗黎明紅個陣佢都未出世，但除左跟風之外，其實咁多人討論黎明，就證明呢個名係香港人心目中有一定嘅價值。 黎明熱潮其中一個主因，絕對係因為香港所謂樂壇已經青黃不接，坦白講今年香港新人你地又記得邊幾個？我自己就一個都唔識。香港主流音樂已經冇得再攪，某程度上係因為少左d好似黎明咁嘅藝人，咁佢係點嘅藝人呢到底？

講下黎明嘅音樂，好多首黎明嘅快歌係音樂上都好講究，係而家香港呢個著重歌詞嘅地方，已經好少聽到一d令人好引象深刻嘅篇曲，香港而家大部份歌，好奇怪地只係一味賣歌詞，務求要聽眾聽完之後死去活來，身同感受咁，香港而家大部份嘅歌，做出黎只係要你抄d歌詞出嚟放係Facebook，Instagram 上面懶感性用，歌詞雖然係重要，但其實編曲都係一首歌嘅靈魂，成日話音樂無分國界，好似我地聽唔明韓文，但點解覺得幾正，好多時就係因為佢地嘅音樂做得好，又夠洗腦。但香港而家D歌，我諗外國人聽完應該完全唔知有咩特別，玩估歌仔估而家d歌實死得。反觀黎明d歌，我諗除左腦退化，否則十幾年後我應該仲記得眼睛想旅行嘅音樂同歌詞係點。

另外，黎明係當年係香港算係好肯投資係拍MV嘅人，佢好多MV都用大量CG，你而家睇可能覺得攪笑，但當年來講真係算係咁，仲有佢用親d女都係正，係香港未興韓風時佢已經成日搵韓妹拍MV（例：全智賢），佢嘅作風成為左一個黎明style，反觀而家d香港MV，好多首都抄韓國格式，再唔係就求求奇拍一個大頭樣，毫無特色可言，最悲哀係，而家要上位最好嘅方法係拍d極底質MV，咩FFX個D，你愈低班觀眾愈受，惡性循環，最後冇人會打算投資去做高質素MV，所以黎明成功係有原因，佢d歌當年其實點都有人聽，點解要花咁多時間金錢去做一個MV，某程度應該同佢個人咩都想做到最好同處事認真有關，呢點你睇佢近日處理問題嘅手法就知，我都唔多講。

一句講哂，香港人對香港樂壇餓左好耐，好耐冇一d可以餵飽香港人嘅「香港音樂」，所以黎明嘅回歸先會有咁大嘅影響，但講真，攪到今日咁其實已經好難番轉頭，而家就算再有另一個再世黎明出現係香港，佢最後都可能要去賣保險跑數。