當日我反神魔 今日我下載咗時空之門

2年前，唔知大家記唔記得，我整左首歌關於神魔之塔，時至今日，都仲有人係度留言爭論到底神魔有冇抄襲，呢篇野冇打算再討論呢個問題，我要講嘅係MADHEAD嘅新作—時空之門。

19號當日係時空之門封測嘅日子，我都下載咗嚟玩，你問我點解會知佢封測？因為我Like左佢個Page，你可能會話你變咗喇，出賣靈魂喇，為錢出賣人格喇，講一套做一套喇等等，但我想講嘅係時空之門同神魔除左同一個老母之外，時空之門先係真正做到新嘅Idea係base on舊嘅Idea，不過係唔係一個好嘅Idea，我地容後再講。

經過左咁耐，咁多年，MADHEAD終於學識咩叫創作，至少現時為止係時空之門我未見到有任何「天空龍」咁嘅物體出現，雖然呢種層層疊式三消遊戲出面已經有，MADHEAD甚至請埋「原創者」交流，但咁嘅玩法加上育成課金其實算係開先河，人物設計都幾高水準，角色郁郁下，令人非常想抽中女角（重點：少布），同埋有故事劇情（呢點佢當然會繼續，話哂係神魔時期佢地「原創」嘅野），畫面方面都幾華麗，好喇，讚完一論，其實時空之門仲有好多問題要改善。

層層疊式三消到底係咪真係適合變成育成遊戲？

所有野都有利有弊，開得先河就自然有自己嘅風險，我唔會話呢個玩法有問題，但成隻時空之門，硬係好似少咗份爽快感，D磚嘅跌落同消失個速度好尷尬，我知道有D技能可以加快個掉落速度，但我見時空之門個參考對象Monster Ate My Condo就冇咁嘅問題，成個Flow好順，每一下消除都有個爽快感，好似PAD，你消珠有Combo時佢會有一粒音慢慢升Key，你會感覺到高Combo個種爽快感，但時空之門，無論跌落同消除個下俾我嘅感覺都好慢，而個種慢係冇必要嘅，偏偏跌落同消除個下又計緊你時間，而我覺得呢D基本野其實唔應該要靠技能去改善，因為呢個係用戶體驗嘅問題。

靚係靚，不過有個致命傷

個遊戲畫面同人設雖然係中上，香港嚟講可以話超班，（其實我唔太鐘意佢戰鬥背景個表達手法，不過呢點好主觀，所以唔作討論）但有一個好大問題，就係D字體，好多時D人以為設計用黑體/冇腳字實冇死啦，但其實只要你留意下，一個好嘅遊戲，就連字體都會玩埋，又攞PAD做例子，佢地隻Game會有佢地專用嘅字體，雖然都係買番黎，但至少好嘅字體會令你認出隻Game，甚至成為隻Game嘅標記。

以上係我玩左半日後嘅感覺，總括嚟講，睇得出時空之門係想做D野，但少左個抄襲對象就好似少咗父蔭，如果你當呢個係MADHEAD原創嘅第一步的話，只能講萬事起頭難，原創真係好難，好辛苦，所以成果更加值得珍惜。