大家睇咗《自殺特工》未？唔駛問小丑女一定係入面其中一個最吸引人嘅角色，但大又知唔知佢背後嘅故事？（無劇透）

小丑女，原本係一個心理醫生，因為佢老豆係一個衰人，攪到自己屋企家不成家，所以佢想了解呢D壞人心裡面到底諗咩，就走左去做心理醫生，去研究罪犯嘅心理，為左挑戰自己，佢決定去研究葛咸城入面，一個最出名嘅痴線佬。

嗰個就係小丑。

係研究嘅過程裡面，小丑開始同佢傾訴心中嘅一切，甚至講埋自己細個嘅時候，點樣俾老豆家暴，同樣出身係破碎家庭嘅小丑女，可能感同身受，可能俾小丑迷惑到，竟然開始同情佢，心裡面諗：「我好似有少少鍾意咗佢呀。」

愛一個人，越愛就越難忘記佢，佢開始徹底咁迷上左小丑，愛上左一個「佢認為」只係用「痴線」同「做盡壞事」去掩飾自己傷痛嘅可憐人。於是佢幫小丑逃出精神病院，自己都放棄左做心理醫生，為左同小丑更加親近，佢改變自己，變成小丑女。

你以為佢地咁就開開心心作惡，做一對亡命鴛鴦？錯喇，小丑其實冇鐘意過佢，每日對佢打打鬧鬧都算小事，小丑仲試過推佢落街，攪到佢傷哂，最過份係，佢有次真係想「飛左佢」，點飛？就係困小丑女喺火箭，想當佢超夢夢咁射上太空呀！

但肉體嘅痛都不及心靈上嘅痛，後來小丑女發現，原來小丑口中所講嘅童年，只係虛構出嚟搏佢同情，等佢愛上自己，幫自己逃走。小丑女知道之後非常傷心，簡直唔敢相信。

雖然因為呢段關係，小丑女受盡傷害，但佢仲係咁愛小丑，試過離開，諗過放棄，但最後都係返番去。

有人問過小丑女：「呢個衰人、痴線佬，到底有咩好？你一日到黑跟住佢係咩感覺？」佢話：「就好似⋯ 一場激吻。」

可能愛情就係咁盲目，身邊總有一個人，或者自己，愛上一個唔應該愛嘅人，為佢瘋，為佢狂，為佢痴痴迷迷。

如果係你，你又會做一個為愛情犧牲同瘋狂嘅小丑女，定愛自己比任何人更多嘅小丑？

*以上都係根據不同嘅漫畫同動畫加加減減所寫，唔係講緊《自殺特工》套戲入面嘅小丑同小丑女，如果你只係睇過套戲的話，你會覺得我呢騙嘢係亂作。

*睇完《自殺特工》，覺得係好過《蝙蝠俠對超人》，但唔劇透，唔講太多。