差唔多兩年冇打過LOL（英雄聯盟）喇，尋日無聊得濟冇野做，打開隻Game，差D連密碼都唔記得，點知Update都要得成個鐘，我要做ADC打爆下路呀，快手少少得唔得呀！

好啦，等完Update，諗住邀請個Friend list D朋友一齊玩啦，打開個List先發現，以前晚晚打到覺都唔願瞓嘅嗰班朋友，一個都冇Online。

兩年後打開LOL，先發現個介面，玩法全部都變哂，變到好陌生，好唔慣，總係覺得以前嘅LOL好D，但其實，跟本已經返唔番以前，就好似自己嘅人生咁，改變咗，就算點努力，點都冇得返轉頭。個Friend List都一樣，唔會再有舊人Online。

因為好多原因，身邊嘅朋友已經離自己愈來愈遠，有D冇搵冇搵就淡出左自己個生活圈子，有D朋友本身係同事，冇打嗰份工之後，就冇再聯絡，有D因為小事嘈交，毛啦啦變到勢不兩立，望住個List，Online嘅得番自己一個，再望吓自己個電話，連一個可以傾吓計嘅朋友都冇，明明以前晚晚都會約埋一齊打機，開住個Skype吹水，可能中途會你話我廢，我話你累事，但真係好熱鬧，而家，自己一個係下路，同一個三唔識七嘅Support一齊，心裡面就會諗：「以前我某位朋友做Support做得好好，佢一定唔會係咁。」其實，我知道我朋友都唔係咩好嘅Support，我咁諗，可能純粹因為佢係我朋友。

求其咁打咗場，話就話贏咗，但已經冇咗以前個種快感，或者，以前玩LOL，跟本唔係為咗贏、為咗咩牌位，只係因為享受一班人開開心心打機，嘻嘻哈哈咁過咗個晚上。

咁又係，LOL都賣咗俾騰訊，仲邊係以前嘅LOL。

如果，今日你有朋友同你一齊打機，Overwatch又好，Pokemon Go陪你捉精靈又好，玩完個陣，記得同佢講聲多謝，捉完精靈番屋企之前望清楚佢個樣，記住自己同佢一齊打機嘅日子，因為，到你咩都無嘅時候，可能就係佢哋陪你一世，玩埋最後一個遊戲，叫「人生」。