食過夜粥嘅創作女歌手……JuJu周董上身

東方日報‎[東方電視] 球愛敢死隊：JuJu陳鈺芸Part 1 http://tv.on.cc/index.html?s=3&ss=95&i=OSP-120324-11580-19M&d=1332601606‎[東方電視] 球愛敢死隊：JuJu陳鈺芸Part 2  http://tv.on.cc/index.html?s=3&ss=95&i=OSP-120324-11580-19M&d=1332601606#食過夜粥嘅創作女歌手……JuJu周董上身 「球」愛敢死隊自出街以來，武鬥時間多數都係玩波為主，真係足球、籃球、網球乜都玩過。雖然波係好玩，但為證明敢死隊係一個多元化節目，就搞搞新意思，變做「武」愛敢死隊，同靚女嘉賓耍功夫。今次我哋請到創作女歌手陳鈺芸（JuJu）上嚟，耍兩招畀大家睇吓。咪以為JuJu係音樂人就好內向好斯文，其實佢百足咁多爪，禮樂射御書數六藝瓣瓣精。據JuJu所講，佢由細到大都食慣夜粥，學過洪拳、詠春、柔道、合氣道，簡直係集各家之大成。參與過電影《詠春小龍》之後，更被譽為新一代打女。其實JuJu係動靜皆宜嘅靚女，除咗對武術有興趣之外，亦彈得一手好鋼琴，本身又係理科達人，主修電腦科學及數學，所以話佢多才多藝就係咁解。既然今次請JuJu上嚟露兩手，佢梗係盡騷哥利啦！其中一個精采環節就係耍雙節棍。當大家仲懷疑JuJu舞唔舞得掂，會唔會打親自己之時，JuJu即刻以行動證明一切，好似周杰倫上身一樣，兩碌棍不停閃動，小記同攝影師都嘩嘩聲，一齊唱：「快使用雙節棍，哼哼哈兮」！大家都知雙節棍係高層次兵器，一唔小心就會扑親自己，JuJu話初時練習經常受傷，依家可以揮灑自如，絕對係血與汗換來嘅成果。###現跟徐家傑學泰拳 最近JuJu話想學吓泰拳，感受吓拳拳到肉嘅感覺，所以就去咗由徐家傑創立嘅坤青拳會，學習泰拳基本動作。或者因為JuJu身手不凡，加上徐師傅悉心指導，JuJu好快就掌握到泰拳基本功，徐師傅都讚佢有天分，係習武嘅好材料。#三招K.O.大肥賊 為要進一步測試JuJu嘅身手，敢死隊搵嚟一個身高手長，體重逾二百磅嘅「大肥賊」威嚇JuJu，睇吓佢有乜招數，化解持械「肥賊」嘅來犯。JuJu就話砌低「肥賊」簡直係「依絲執」，根本唔需要兵器輔助，赤手空拳都夠殺喎！及後JuJu就介紹三招必殺技畀大家，好讓姊妹們學番兩三吓散手保護自己。據JuJu所講，招式係糅合各家精粹，最緊要係夠簡單直接，就算初學者或女孩子都好易上手。JuJu示範三招時更毫不留情，每次出手都快狠準，搞到「大肥賊」一仆一碌，要向女俠跪地求饒，仲想拜JuJu為師，都咪話唔厲害。圖／文：司徒子文、巨高