相信好多留意開YouTuber既朋友都知道我地好多網絡人都參與TVB既節目《網絡挑機》今晚就出街，網上反應都好熱烈，尤其見到伍公子叫人唔好睇，更加上埋蘋果日報！

好多人話我地參與TVB既節目係擦鞋、奶共、跪低、牆頭草、搏上鏡、恨做明星⋯⋯我相信每個單位肯參與既原因都唔同，我承認我想俾多D人認識我同我既音樂，肯去拍都只係自己一個新嘗試，That's It，把口係人地度我控制唔到，亦唔會期望呢個節目會帶黎D咩機遇。

Remix都出過我係反對一台獨大，而咁岩獨大既係TVB，所以TVB變得粗製濫造變得迂腐，如果係ATV獨大都可能會一樣霸道。但講真香港人對TVB果種又愛又恨唔會減退，坤哥都係TVB出身但依然形象討好大把fans。至於TVB係咪引我地成班入局然後恥笑我地我唔會知，起碼對我黎講，YouTube先有既元素可以係TVB出現已經係一個突破。

呢次拍攝我仲同「終極藍絲代表」周融同馬恩國見面（睇佢兩個就知咩係「相由心生」），我講完年輕人想法兩位都係繼續自我感覺良好，認為大陸市場大，叻人都上大陸搵錢，我同佢地講「廢青有骨氣」，佢地就「骨氣唔可以當飯食」，其實都係口和心不和，同張相一樣，皮笑肉不笑。

網絡挑機

TVB

YouTuber

皮笑肉不笑

口和心不和