尋晚講到我搭正２３１５於花墟公園出發，沿途經窩打路道過行人天橋到打比道 -> 何東道 -> 蘭開夏道 -> 衙前圍道 -> 廷文禮士道 -> 東寶庭道到達＜賈炳達道公園＞做一個名為「蒙眼大考驗」的項目，記得上年我係灣仔天橋行，覺得超驚超恐佈，仲叫帶我行的人行慢Ｄ添，今次轉o左係公園進行，可能係第２次蒙眼行o既關係啦，今次就一Ｄ都唔驚喎，仲同朋友行得好快添，不過我就略嫌呢段路唔夠長，長Ｄ體會都深Ｄo丫！！
完成「蒙眼大考驗」後到達第１個大型中途站＜賈炳達道公園＞(3km)，先蓋第一個印後收到一盒Cappuccino味麥提莎同可以加水，因為整晚我一滴水都冇飲過，其實我經過Ｄ補給站都係志在影張相o者。不過Ｄ義工真係好醒又正呀，見我舉機影相都唔怕羞，仲俾哂反應任我影添！影完我都有向佢地講句：多謝你地有反應呀！！！
之後由樂善道出發，經過九龍寨城、越秀廣場、新蒲崗沿太子道東向彩虹村 -> 彩雲村，呢條係名為長命斜地段呀！初時行都唔覺好斜o者，再行高Ｄ就覺都幾斜喇，最攪笑係行行o下有架巴士停o左係到，我同朋友望住個司機，佢好大聲問我地係咪要步行去西貢？由邊到出發？朋友咪答佢花墟公園囉，司機就笑笑口話"真係呀"就開車走喇！咁都得？前面有兩個警察係到喎，無啦啦停低就係問我地呢個問題？
咁又係o既，係我行馬路邊的途中，好多晚巴士、私家車o既司機乘客都有望過唻，個樣都係幾疑惑o既，緊係覺得點解夜媽媽條路不斷都有人行啦！
到了第１個補給站＜順利村遊樂場＞(7.3km)，又係派水同Ｍ﹠Ｍ，拎過朱古力後就繼續往前行喇。
經過新清水灣道 -> 清水灣道去到第２個補給站＜壁屋小涼亭＞(11.5km)，好攪笑呀，叫我加水o既男仔係著住監獄衫架...我一舉機佢又好醒咁Ｖ起手喎，ＧＯＯＤ！今次唔係派朱古力喇，係一個襟章，上年係行完「蒙眼大考驗」派的，仲以為今年冇添，好彩都係有o者，好野！！！
再行到去打鼓嶺第２個大型中途站(13.3km)，有椅俾你坐低休息，蓋第２個印同有包餅食。我緊係繼續行啦。
繼續沿清水灣道行，去到迴旋處(隧道)Ｄ義工最開心，拎哂Ｄbongbong捧叫我地加油，我就跑過去啦，仲同o左４個女仔Give me Five 添...哈哈哈哈，好開心呀！
之後就往蠔涌出發去到匡湖居(14.8km)，終於見到有間7-11喇，我即刻走入去買o左罐Zero同一盒檸檬薄荷糖啦，即時涼哂呀！
沿住白沙灣對住個好平靜的海咁行，都冇乜好睇喇。行到去最後一個補給站白沙灣(17km)，又係補水囉，同埋派o左排Dove朱古力，拎過朱古力繼續加快少少腳步行啦，因為真係就到喇。
行到最後果２km，開始見到有人跑返終點喇，我依然以自己步伐繼續行，最後就係０２５９到終點！
蓋埋最後一個印，拎埋早餐飲品就可以休息啦！！！
今次行得比上次開心，路也冇上年咁迂回，或者因為咁所以先可以快過上次５２分鐘。
只是風景比去年少、睇極都係馬路有點悶。可能因為今年太多人參加啦，所以沿路都有好多警察維持路面情況。
義工也特別出聲落力加倍咁叫加油！！我一見到Ｄ義工咁開心地叫嚷我地加油，我都一同叫埋出唻呀，咁大家都有反應先開心架嘛！
希望出年有第２條路線啦，但冇o既出年都一定會繼續參加呀！
不過上年行行o下已經要自己記得著下年行要著運動褲同雞翼袖架啦，今年依然唔記得，著牛仔褲真係好熱呀！！！！記住出年要記得呀！！
最最最最多謝o既係今年有份贊助我行路的各方好友！！今年共籌得＄3678 呀！！！
多謝！！！ 沿路都見到好多呢Ｄ牌仔，見到真係份外愉快呀！！
Entry comments (0)